Presidenti kinez Xi Jinping u kthye në ekspert për zgjedhjet në fillim të vizitës së profilit të lartë shtetëror në Moskë të hënën dhe shprehu besimin se rusët do ta mbështesin Vladimir Putinin në zgjedhjet presidenciale të vitit të ardhshëm.
Çuditërisht, Xi nuk iu referua asaj që ndodh me kundërshtarët politikë të Putinit.
“E di që vitin e ardhshëm do të ketë një tjetër zgjedhje presidenciale në vendin tuaj”, i tha Xi Putinit në fillim të bisedimeve në Kremlin, raportoi agjencia shtetërore e lajmeve TASS. “Falë lidershipit tuaj të fortë, Rusia ka bërë përparim të rëndësishëm në arritjen e prosperitetit … në vitet e fundit. Jam i sigurt se populli rus do ta mbështesë fuqishëm zotin President”.
Putin, 70 vjeç, pritet gjerësisht të shkojë për një mandat tjetër për postin e lartë vitin e ardhshëm, ndërsa Xi, 69 vjeç, sapo siguroi një tjetër mandat presidencial më pak se dy javë më parë duke thyer normat e Partisë Komuniste të përcaktuara dekada më parë.
Xi u bë lideri i parë botëror që takoi Putinin pasi liderit rus iu lëshua një urdhër arresti nga Gjykata Penale Ndërkombëtare javën e kaluar për rolin e tij në atë që gjykata e konsideron si transferim të paligjshëm të civilëve ukrainas në tokën ruse.
Pekini vë në pikëpyetje masën e ICC. “GJPN-ja duhet të mbajë një qëndrim objektiv dhe të drejtë, të respektojë imunitetin juridiksional të një kreu të shtetit sipas ligjit ndërkombëtar, të ushtrojë me maturi mandatin e tij në përputhje me ligjin, të interpretojë dhe zbatojë të drejtën ndërkombëtare në mirëbesim, dhe të mos përfshihet në politizim ose duke përdorur standarde të dyfishta”, tha të hënën zëdhënësi i Ministrisë së Jashtme Wang Wenbin.
Gazeta Shqiptare
